2025-жылдын 29-ноябрында Бишкек шаарынын мэриясы жана «Бай-Таш Групп» компаниясы Чокан Валиханов атындагы Бишкек жылуулук тармагынын техникалык каналы («кайнененин тили» деп аталган участок) аркылуу өтүүчү жаңы көпүрөнү куруу боюнча меморандумга кол коюшту.

Бул тилке көп жылдан бери көйгөйлүү болуп келген: жолдун тардыгы, өткөрүмдүүлүктүн төмөндүгү жана ыңгайлуу тротуарлардын жоктугу аймак тургундары үчүн олуттуу кыйынчылыктарды жараткан. Жаңы көпүрө бул чектөөлөрдү жоюп, транспорттук байланыштарды кыйла жакшыртат.

Курулуш иштери 2025-жылы башталат. Долбоордо алты тилкелүү кыймыл, 90 метр узундуктагы көпүрө жана эки тарабында 3 метрден болгон тротуарлар каралган. Курулушту 2026-жылдын июнь айында бүтүрүп, пайдаланууга берүү пландалууда. Иштер Бишкек шаарынын мэриясынын каржылоосу менен жүргүзүлүп, төлөм жергиликтүү бюджеттен 3–5 жыл ичинде этап-этабы менен жүргүзүлөт.

Бишкек шаарынын мэриясы заманбап жана ыңгайлуу шаардык инфратүзүмдү түзүү боюнча ишин ырааттуу улантууда. Бул долбоорду ишке ашыруу — шаар чөйрөсүнүн сапатын жана тургундардын жашоо шарттарын жакшыртууга болгон кезектеги маанилүү кадам.