Мэр Айбек Джунушалиевдин кесиптик окуу жайларынын директорлору менен болгон жолугушуудан кийинки тапшырмаларына ылайык, мектеп окуучуларына дуалдык билим берүү программасын практикалык жүзөгө ашыруу башталды.

“Ачык эшиктер күнү” алкагында №100 лицейде мектеп окуучуларын эрте кесиптик даярдоого багытталган жаңы долбоор старт алды.

Долбоорго биринчи кошулган мектептердин бири №68 мектеп болду. Анын окуучулары лицей сунуштаган  ширетүү иштери, монтаж жана авто оңдоо окуу багыттары менен таанышышты.

Алгачкы окуучулар жакында окууну башташат. Окуу процесси практикага багытталган болот: окуучулар мектеп сабактарын лицейдин устаканаларында практикалык окутуу менен айкалыштырып, алган билимдерин колдоно алышат.

Долбоор 12 жылдык билим берүү системасына өтүү чегинде ишке ашырылууда. Жаңы форматта окуучулар коомдук сабактарды гана эмес, кесиптик компетенцияларды да өздөштүрүп, келечектеги кесибине байланыштуу биринчи көндүмдөрдү окуу учурунда эле ала алышат.

Бул модель окуучуларга кесип тандоосун алдын ала аныктоого, реалдуу көндүмдөрдү өздөштүрүүгө жана кесиптик өсүүгө ишенимдүү кадамдарды жасоого мүмкүндүк берет. Демилге жалпы жана кесиптик билим берүүнүн байланышын бекемдөөгө, ошондой эле жаштардын техникалык кесиптерге кызыгуусун арттырууга багытталган.

Бул багыттагы иштер мэрия тарабынан улантылат. Бишкек шаарынын мэриясы окуучуларга тандалган багыттар боюнча окуу үчүн бардык зарыл шарттарды түзөт.