Бишкек шаарынын мэриясынын Жеке турак жай курулушу жана шаар куруу департаменти жөнүндө
ЖОБО

1. Жалпы жоболор

1. Ушул Жобо Бишкек шаарынын мэриясынын Жеке турак жай курулушу жана шаар куруу департаментинин (мындан ары - Департамент) иш-аракетинин укуктук жана уюштуруучулук негиздерин аныктайт.

2. Департамент жеке турак жай курулушу үчүн жер участокторуна укуктарды берүү боюнча, Бишкек шаары боюнча жеке турак жай курулушу маселелеринде өткөрүп берилген айрым мамлекеттик ыйгарым укуктар, ошондой эле Бишкек шаарынын аймагын өнүктүрүү жана келечектүү шаар курууну пландоо боюнча иштерди уюштурууну жүзөгө ашырган Бишкек шаарынын мэриясынын түзүмүнө кирген ыйгарым укуктуу орган болуп саналат.

3. Департамент Бишкек шаарында жеке турак жай курулушу үчүн жер участокторуна укуктарды берүү боюнча иштерди жүзөгө ашыруу бөлүгүндө Бишкек шаарынын мэриясынын Муниципалдык мүлктү башкаруу боюнча департаментинин жана Бишкек шаарынын аймагын өнүктүрүү жана келечектүү шаар курууну пландоо боюнча иштерди жүргүзүү боюнча Бишкек шаарынын мэриясынын Шаар куруу жана архитектура департаментинин укук мурастоочусу болуп саналат.

4. Департамент уюштуруу-укуктук формада юридикалык жак - мекеме болуп саналат, өз алдынча баланска, банк мекемелеринде эсептерге, бюджеттик эсептешүү эсебине, казына органдарында депозиттик эсепке (Бишкек шаары боюнча РКБ), Кыргыз Республикасынын Мамлекеттик гербинин сүрөтү түшүрүлгөн мамлекеттик жана расмий тилдерде өзүнүн аталышы жазылган мөөрүнө, фирмалык бланктарына, штамптарга жана башка реквизиттерге, расмий атрибуттарга ээ, сотто доогер жана жоопкер катары чыга алат.

5. Департамент өз иш-аракетинин алкагында Кыргыз Республикасынын Конституциясын, Кыргыз Республикасынын башка ченемдик укуктук актыларын, Кыргыз Республикасынын мыйзамдарына ылайык күчүнө кирген эл аралык келишимдерди, Бишкек шаарынын жергиликтүү өз алдынча башкаруу органдарынын ченемдик укуктук актыларын, Бишкек шаарынын мэриясынын чечимдерин, архитектуралык-курулуш иш-аракети чөйрөсүндө мамлекеттик ыйгарым укуктуу органдын актыларын жана көрсөтмөлөрүн, ошондой эле ушул Жобону жетекчиликке алат.

6. Департамент өз иш-аракетин Кыргыз Республикасынын башка мамлекеттик органдары, жергиликтүү өз алдынча башкаруу органдары, ошондой эле башка юридикалык жана жеке жактар менен өз ара аракеттенүүдө жүзөгө ашырат.

7. Департаменттин мамлекеттик жана башка органдар, ошондой эле менчигинин түрүнө карабастан юридикалык жана жеке жактар менен өз ара мамилелери Кыргыз Республикасынын мыйзамдарына ылайык жүзөгө ашырылат.

8. Департаменттин толук аталышы:

- мамлекеттик тилде: "Бишкек шаарынын мэриясынын Жеке турак жай курулушу жана шаар куруу департаменти";

- расмий тилде: "Департамент индивидуального жилищного строительства и градостроительства мэрии города Бишкек".

Департаменттин кыскартылган аталышы:

- мамлекеттик тилде: ЖТЖК;

- расмий тилде: ДИЖС.

9. Департаменттин жайгашкан орду: Кыргыз Республикасы, Бишкек шаары, Туңгуч кичи району, № 57 үй.

10. Департаменттин кызматкерлери муниципалдык кызматчылар болуп саналат.

11. Департаменттин компетенциясынын чегинде кабыл алынган анын чечимдери жана буйруктары бардык мамлекеттик жана башка органдар, ошондой эле менчигинин түрүнө карабастан, юридикалык жана жеке жактар үчүн милдеттүү болуп саналат.

2. Департаменттин максаты жана милдеттери

12. Департаменттин иш-аракетинин максаты жеке турак жай курулушу үчүн жер участокторуна укуктарды берүү боюнча иштерди уюштуруу, Бишкек шаары боюнча жеке турак жай курулушу маселелеринде өткөрүп берилген айрым мамлекеттик ыйгарым укуктарды жүзөгө ашыруу, ошондой эле Бишкек шаарынын аймагын өнүктүрүү жана келечектүү шаар курууну пландоо боюнча иштерди жүргүзүү болуп саналат.

13. Департаменттин негизги милдеттери төмөндөгүлөр болуп саналат:

- жеке турак жай курулушу үчүн жер участокторуна укуктарды берүү боюнча иштерди уюштуруу;

- жеке турак жай курулушу чөйрөсүндө өткөрүп берилген айрым ыйгарым укуктарды ишке ашыруу;

- мыйзам тарабынан белгиленген тартипте Бишкек шаарын тийиштүү шаар куруу документтери менен камсыздоо;

- шаардын Башкы планын жана башка бекитилген шаap куруу документтерин ишке ашырууну камсыздоо жана мониторинг жүргүзүү;

- өз компетенциясынын чегинде Бишкек шаарынын мэриясынын инвестициялык программаларын иштеп чыгууга жана ишке ашырууга катышуу.

3. Департаменттин негизги иш-милдеттери

14. Департамент өзүнө жүктөлгөн милдеттерди аткаруу максатында, Кыргыз Республикасынын мыйзамдары жана Бишкек шаарынын жергиликтүү өз алдынча башкаруу органдарынын ченемдик укуктук актылары тарабынан белгиленген тартипте:

- Бишкек шаарында жеке турак жай куруу үчүн жер участокторуна укуктарды берүүгө карата арыздарды карайт жана жеке турак жай курулушу үчүн Бишкек шаарында жер участокторуна укуктарды берүү боюнча комиссияга (мындан ары - Комиссия) тийиштүү материалдарды даярдайт;

- Комиссиянын чечимдерин өз убагында жана сапаттуу аткарууну жүзөгө ашырат;

- курулушчулардын ыктыярдуу кайрылуусунда курулган жеке турак үйдүн техникалык регламенттердин жана башка ченемдик укуктук актылардын талаптарына шайкеш келишине баалоону жүзөгө ашырат;

- курулушу бүткөрүлгөн жеке турак үйдүн техникалык регламенттердин жана башка ченемдик укуктук актылардын талаптарына шайкеш келиши жөнүндө билдирүүлөрдүн кабыл алынгандыгы жана бул объект боюнча маалыматтар тийиштүү реестрге киргизилгендиги тууралуу ырастама берүүнү жүзөгө ашырат;

- курулушу бүткөрүлгөн жеке турак үйдүн техникалык регламенттердин жана башка ченемдик укуктук актылардын талаптарына шайкеш келиши жөнүндө билдирүүлөрдүн кабыл алынгандыгы тууралуу ырастамалардын реестрин жүргүзүүнү жүзөгө ашырат,

- жеке жактарга жер участокторуна укуктарды берүү жөнүндө арыздарын (өтүнүч кат) кароо мөөнөттөрүн бузууга жол бербөө жана жоюу боюнча чараларды көрөт;

- төмөндөгү багыттар боюнча Департаменттин автоматташтырылган маалыматтык тутумун түзүүнү, коштоону жана өркүндөтүүнү жүзөгө ашырат:

электрондук документ жүгүртүү тутуму;

Департаменттин электрондук архиви;

бүткөрүлгөн жеке турак үйдүн техникалык регламенттердин жана башка ченемдик укуктук актылардын талаптарына шайкеш келиши жөнүндө билдирүүлөрдү кабыл алуу тууралуу ырастамалардын электрондук реестри;

Комиссиянын жыйындарынын протоколдорунун электрондук реестри;

- мамлекеттик сырларды сактоо жана маалыматты коргоо иш-милдеттерин аткаруу менен, мамлекеттик сырга жана купуя маалымат категориясына кирген маалыматтарга карата Кыргыз Республикасынын мыйзамдары тарабынан белгиленген коргоо шарттамын ишке ашырат;

- өзүнүн компетенциясынын чегинде белгиленген тартипте чет өлкөлүк өкүлчүлүктөр, юридикалык жана жеке жактар менен мамилелерде Бишкек шаарынын кызыкчылыгын коргойт;

- жеке турак жай курулушу маселелери боюнча ченемдик укуктук актыларынын долбоорлорун иштеп чыгат;

- Бишкек шаарынын аймагында колдонулуучу шаар куруу иш-аракети жаатында Бишкек шаарынын мэриясынын бирдиктүү саясатын иштеп чыгат, ишке ашырат жана координациялайт;

- Бишкек шаарынын аймагында жана шаар четиндеги зоналарда колдонулуучу мамлекеттик шаар куруу саясатын иштеп чыгууга катышат;

- шаардын Башкы планынын жана башка бекитилген шаар куруу документтеринин ишке ашырылышын камсыздоону жана мониторинг жүргүзүүнү жүзөгө ашырат;

- шаардын өзүнчө бөлүктөрүнүн шаар куруу документтерин иштеп чыгуу боюнча сунуштарды киргизет;

- өз компетенциясынын чегинде Бишкек шаарынын мэриясынын инвестициялык программаларын иштеп чыгууга жана ишке ашырууга катышат;

- Департаменттин ыйгарым укуктарынын алкагында шаардын бюджетинин долбоорун иштеп чыгууга катышат;

- тапшырыкчынын Бишкек шаарынын шаар куруу документтеринин иш-милдеттерин жүзөгө ашырат.

4. Департаменттин укуктары жана милдеттери

15. Департамент төмөнкүлөргө укуктуу:

- өз мүлкүнө оперативдүү башкаруу укугунда, өзүнүн иш-аракетинин максаттарына жана мүлктүн арналышына ылайык ээлик кылууга жана пайдаланууга;

- Департаментке ишенип берилген мүлктү камсыздандырылган коргоону жүзөгө ашырууга багытталган иш-чараларды ишке ашырууга;

- сот жана башка укук коргоо органдарында Бишкек шаарынын мэриясынын кызыкчылыктарын коргоого, ошондой эле өз компетенциясынын чегинде Кыргыз Республикасынын сотуна, анын ичинде Кыргыз Республикасынын мыйзамдарын бузуунун натыйжасында келтирилген зыяндын ордун толтуруу жөнүндө доо коюуга;

- Кыргыз Республикасынын мыйзамдарына ылайык, Департамент иш-аракетин камсыздоого багытталган келишимдерди, контракттарды, макулдашууларды жана башка документтерди түзүүгө;

- Департаменттин компетенциясына кирген маселелер боюнча ченемдик укуктук актыларды өркүндөтүү боюнча сунуштарды Бишкек шаарынын мэриясына киргизүүгө;

- Департаменттин компетенциясына кирген маселелер боюнча комиссиялардын, атайын жумушчу топтордун ишине катышууга;

- жарандарды кабыл алууга, Департаменттин компетенциясынын маселелери боюнча келип түшкөн сунуштарды, арыздарды жана даттанууларды кароого, алар боюнча зарыл чараларды көрүүгө;

- Бишкек шаарынын мэриясынын түзүмдүк бөлүмдөрүнөн, ошондой эле Департаменттин компетенциясынын чегинде мамлекеттик органдардын тиешелүү аймактык бөлүмдөрүнөн тийиштүү маалыматтарды жана документтерди сурап алууга;

- өз компетенциясынын чегинде буйруктарды чыгарууга;

- долбоорлорду жана шаар куруу документтерин иштеп чыгуу боюнча белгиленген тартипте кеңештерди, кеңешмелерди, конференцияларды жана жумушчу топторду өткөрүүнү уюштурууга;

- Кыргыз Республикасынын ченемдик укуктук актылары тарабынан каралган башка укуктарды жүзөгө ашырууга.

16. Департамент төмөндөгүлөргө милдеттүү:

- Департаменттин кызматкерлерин коопсуз эмгек шарттарын камсыз кылууга жана алардын ден соолугуна жана эмгекке жөндөмдүүлүгүнө келтирилген зыян үчүн жоопкерчилик тартууга;

- Департаменттин кызматкерлерин социалдык, медициналык жана милдеттүү камсыздандыруунун башка түрлөрүн камсыздоого;

- Кыргыз Республикасынын мыйзамдарына ылайык мамлекеттик сырды жана жашыруун маалыматтарды коргоону камсыздоого;

- Департаментке берилген мүлктөрдү оперативдүү башкаруу укугунда сактоону камсыздоого;

- белгиленген тартипте башка милдеттерди аткарууга.

17. Департамент шаардык бюджеттин жана башка каржылоо булактарынын эсебинен түзүлгөн, топтолгон жана сатып алынган маалыматтык ресурстардын жана автоматташтырылган маалыматтык тутумдардын ээси жана менчик ээси болуп саналат.

18. Департамент пайдалануучулардын (керектөөчүлөрдүн) чөйрөсүн, маалыматтык ресурстарды пайдалануунун жана жайылтуунун шарттарын, ошондой эле жеткиликтүүлүгү чектелген маалыматты коргоо шарттамдарын Кыргыз Республикасынын мыйзамдарында белгиленген тартипте аныктайт.

5. Департаменттин иш-аракетин уюштуруу

19. Департаментти башкаруунун жогорку органы болуп Бишкек шаарынын мэриясы саналат, ал мыйзамдарга ылайык Департаментти түзүү, Департамент жөнүндө жобону бекитүү жана өзгөртүүлөрдү киргизүү, кайра уюштуруу жана жоюу, Департаменттин түзүмүн жана штаттык ырааттамасын бекитүү маселелерин чечет.

20. Бишкек шаарынын мэриясы Департаменттин иш-аракетине тиешелүү бардык маселелер боюнча чечим кабыл алууга укуктуу.

21. Департаменттин жетекчиси болуп, Кыргыз Республикасынын мамлекеттик жарандык жана муниципалдык кызмат жөнүндө мыйзамдарына ылайык, Бишкек шаарынын мэри тарабынан кызмат ордуна дайындалуучу жана кызмат ордунан бошотулуучу директор саналат.

22. Департаменттин директору:

- Департаменттин иш-аракетин жетектейт жана Департаментке жүктөлгөн милдеттердин жана иш-милдеттердин аткарылышы, иштердин жыйынтыгы үчүн жеке жоопкерчилик тартат;

- Департаменттин белгиленген штаттык сандын чегиндеги штаттык ырааттамасын жана иш тартибин Бишкек шаарынын мэриясына бекитүүгө киргизет;

- Бишкек шаарынын мэринин кадрлар номенклатурасына кирген директордун орун басарын кошпогондо, мыйзам тарабынан белгиленген тартипте Департаменттин кызматкерлерин кызмат ордуна дайындайт жана бошотот, аларга карата сыйлоо жана тартиптик жоопкерчилик чараларын көрөт;

- Бишкек шаарынын жергиликтүү өз алдынча башкаруу органдары, Кыргыз Республикасынын мамлекеттик органдары, коомдук жана эл аралык уюмдар, Кыргыз Республикасынын юридикалык жана жеке жактары жана чет мамлекеттер менен өз ара мамилелерде Департаментти көрсөтөт;

- ишеним катсыз аракеттенет, бардык жергиликтүү өз алдынча башкаруу органдарында, жалпы юрисдикция сотторунда Департаменттин кызыкчылыгын көрсөтөт, келишимдерди түзөт, ишеним каттарды берет, банктарда эсептик жана башка эсептерди ачат, банктык жана финансы документтерине кол тамга коёт;

- Департаменттин кызматкерлеринин кызматтык милдеттерин жана башка ички документтерин бекитет;

- Кыргыз Республикасынын мыйзамдарына ылайык Департаменттин мүлкүн, финансы каражаттарын башкаруу боюнча чечимдерди кабыл алат жана финансы-чарбалык иш-аракети үчүн толук жоопкерчилик тартат;

- өз компетенциясынын чегинде Департаменттин кызматкерлери аткарууга милдеттүү болгон буйруктарды чыгарат, көрсөтмөлөрдү берет жана алардын аткарылышын текшерүүнү уюштурат;

- Кыргыз Республикасынын мыйзамдарына ылайык банктарда эсептерди ачат жана жабат, алар боюнча операцияларды жүргүзөт, финансылык документтерге кол тамга коёт, финансылык жана эсептик тартиптин сакталышын камсыздайт.

23. Департаменттин штатында директордун орун басары кызмат орду каралган.

Департаменттин директорунун орун басары Кыргыз Республикасынын мамлекеттик жарандык жана муниципалдык кызмат жөнүндө мыйзамдары тарабынан белгиленген тартипте Бишкек шаарынын мэри тарабынан кызмат ордуна дайындалат жана кызмат ордунан бошотулат.

Департаменттин директору иште жок болгон (убактылуу эмгекке жарамсыздык, кызматтык иш сапары же эмгек өргүүсү) учурда же ыйгарым укуктары токтотулганда, анын ыйгарым укуктарын директордун орун басары убактылуу жүзөгө ашырат.

Департаменттин финансылык документтерине кол тамга коюу укугу директордун орун басарына Департаменттин директорунун тиешелүү буйругунун же Бишкек шаарынын мэриясынын буйругунун негизинде берилет.

Директордун орун басары иш-милдеттери жана Департаменттин директорунун буйруктары тарабынан белгиленген ыйгарым укуктардын чегинде аракеттенет.

Департаменттин кызматкерлери Департаменттин директору тарабынан берилген ишеним каттардын негизинде, ушул Жобо жана кызматтык нускамалар тарабынан белгиленген ыйгарым укуктардын алкагында үчүн чү жактардын алдында Департаменттин атынан аракеттенет.

6. Департаменттин мүлкү

24. Департаменттин мүлкүн оперативдүү башкаруу укугунда ага бекитилип берилген негизги жана жүгүртүү каражаттар, анын өз алдынча балансында чагылдырылган финансылык ресурстар (интеллектуалдык менчик объекттерин кошуп) түзөт.

25. Департаментти күтүүгө карата чыгашаларды каржылоо Бишкек шаарынын мэриясы тарабынан бекитилген чыгашалардын сметасына ылайык, Бишкек шаарынын бюджетинин эсебинен жүзөгө ашырылат.

7. Эсепке алуу жана отчёттуулук 

26. Департаменттин иш-аракетин контролдоону Бишкек шаарынын мэриясы жүзөгө ашырат. Департамент өз иш-аракетинде Бишкек шаарынын мэриясына отчет берет.

27. Департамент мыйзам тарабынан белгиленген тартипте жана белгиленген мөөнөттө бухгалтердик жана статистикалык отчёттуулукту берет. Департаменттин иш-аракетин текшерүүнү ыйгарым укуктуу органдар, ошондой эле Кыргыз Республикасынын мыйзамдарына ылайык, ушундай укук берилген уюмдар тарабынан жүзөгө ашырылат.

28. Департаменттин директору жана башкы бухгалтери Департаменттин финансылык каражаттарын жана мүлкүн эсепке алуунун тууралыгы жана максаттуу пайдаланылышы үчүн жоопкерчилик тартышат. Кыргыз Республикасынын мыйзамдарына ылайык, толук материалдык жоопкерчилик тартышат.

8. Кайра түзүү жана жоюу тартиби

29. Департаментти кайра түзүү жана жоюу Кыргыз Республикасынын мыйзамдарына ылайык жүзөгө ашырылат.

30. Департаменттин иш-аракетин токтотуу Бишкек шаарынын мэриясынын атынан түзүүчүнүн чечими же сот органдарынын чечими боюнча жүргүзүлөт.

31. Департаментти жоюу Бишкек шаарынын мэриясы тарабынан түзүлгөн жоюу комиссиясы тарабынан жүзөгө ашырылат, ал жоюу тартибин жана мөөнөтүн белгилейт.

32. Каттоочу орган тарабынан тийиштүү буйрук чыккан күндөн тартып жоюу аяктады, ал эми Департамент өз иш-аракетин токтотту деп эсептелет.

33. Департаменттин кредиторлорунун талаптары канааттандырылгандан кийин калган мүлкү бул мүлккө буюмдук укугу же Департаментке карата милдеттенмелик укуктары бар Бишкек шаарынын мэриясынын атынан анын түзүүчүсүнө берилет.

34. Иш-аракет процессинде пайда болгон документтер жоюу болгон учурда "Кыргыз Республикасынын Улуттук архив фонду жөнүндө" Кыргыз Республикасынын Мыйзамына ылайык пайдаланылат жана сакталат.