Бишкек шаарынын Ленин районундагы Балдар чыгармачылык борборунда балдардын жана өспүрүмдөрдүн ар тараптуу өнүгүүсү үчүн, анын ичинде каникул учурунда да бардык шарттар түзүлгөн.

Борбор 1985-жылы Пионерлер жана окуучулар үйү катары ачылып, 1991-жылы Балдар чыгармачылык борбору болуп кайра аталып калган. Бүгүнкү күндө мекеме Бакаев көчөсү, 130 дарегинде жайгашкан, ошондой эле Ш. Руставели көчөсү, 111 дарегиндеги «Ырыс» клубун камтыйт. Окутуу кыргыз жана орус тилдеринде акысыз негизде жүргүзүлөт.

Борбордо көркөм-эстетикалык, музыкалык-сахналык, техникалык, спорттук жана интеллектуалдык өнүктүрүү багытындагы ийримдер иштейт. Балдар декоративдик-колдонмо чыгармачылык, хореография, вокал, комуз чертүү, тележурналистика, санариптик технологиялар, авиамоделдөө, ошондой эле спорттун ар түрлөрү жана улуттук күрөш өнөрлөрү менен алектене алышат.

Мындан тышкары, Борбордун ийримдери Ленин районундагы мектептердин базасында да иш алып барат. Жалпысынан Борбордо 48 ийрим иштеп, анда 2 100дөн ашуун бала билим алууда.

Белгилей кетсек, Балдар чыгармачылык борбору каникул маалында да ишин улантат. Ата-энелер балдарын акысыз түрдө кошумча билим алууга, чыгармачылык жөндөмдөрүн өнүктүрүүгө жана пайдалуу эс алууга жөнөтө алышат.