2026-жылдын 19-февралында № 95 мектептин базасында тарбия иштери боюнча директордун орун басарлары жана мектептин медициналык кызматкерлери үчүн «Жалпы билим берүү уюмдарында окуучулардын коопсуздугун камсыз кылуу жана ден соолугун чыңдоо боюнча алдын алуу иштерин күчөтүү» аттуу семинар өткөрүлдү.
Семинардын ишине саламаттык сактоо тармагынын адистери катышты. Алардын ичинде Кыргыз Республикасынын Саламаттык сактоо министрлигине караштуу Эндокринология борборунун балдар эндокринологу А. У. Абикова, өспүрүмдөргө медико-психологиялык жардам көрсөтүү бөлүмүнүн башчысы Т. А. Сагынбаева, ошондой эле БЦУЗдун дарыгери Л. С. Мириева бар.
Шаардык окуучулар арасында сергек жашоо образы боюнча билим жана көндүмдөрдү калыптандыруу айлыгынын алкагында борбор калаанын жалпы билим берүү уюмдарында санитардык-агартуу иш-чаралары өткөрүлүүдө. Аларга класстык сааттар, лекциялар, түшүндүрүү иштери жана окуучулар менен ата-энелер коомчулугу үчүн видеоматериалдарды көрсөтүү кирет.
Иш-чаралар жашы жете электер иштери боюнча инспекторлордун жана медициналык кызматкерлердин катышуусу менен өткөрүлүп, Кыргыз Республикасынын «Жарандардын ден соолугун тамекинин, никотиндин жана айлана-чөйрөдөгү тамеки түтүнүнүн жана аэрозолдун таасиринен коргоо жөнүндө» Мыйзамын аткарууга багытталган.
Тамекини жана башка чегүүчү буюмдарды (насвай, вейп, кальян, чылым), ошондой эле никотин жеткирүүчү электрондук системаларды, анын ичинде электрондук чылым колдонууга тыюу салуу маселесине өзгөчө көңүл бурулууда.
Башталгыч жана орто класстардын окуучулары үчүн «Зыяндуу адаттардын алдын алуу жана сергек жашоо образын калыптандыруу» жана «Эмне үчүн спортчулар чекпейт?» деген темаларда тематикалык сабактар уюштурулууда.
Мындан тышкары, окуучуларга социалдык мааниге ээ болгон оорулардын алдын алуу боюнча маалыматтар берилүүдө. Аларга кант диабети, кургак учук, вирустук гепатиттер, жыныстык жол менен жугуучу инфекциялар, психикалык жана жүрүм-турум бузулуулар, ошондой эле ВИЧ-инфекциясы кирет.
Мындай иш-чараларды өткөрүү өсүп келе жаткан муундун ден соолугун чыңдоого, өз ден соолугуна жоопкерчиликтүү мамилени калыптандырууга жана коопсуз билим берүү чөйрөсүн түзүүгө багытталган.
