Бишкек шаарынын мэри Айбек Джунушалиев Т. Сатылганов атындагы Улуттук филармонияда өткөн Насыйкат Баймырзаевага колдоо ирээтинде уюштурулган кайрымдуулук концертине катышты.

Өзүнүн куттуктоо сөзүндө калаа башчысы жаш таланттын эмгекчилдигин, максаткерлигин жана өнөрүн белгилеп, анын эки көзүнө роговицаны трансплантациялоо операциясын жасатуу үчүн кайрадан каражат бөлүүгө даяр экенин айтты.

«Биз жагдайды талкуулап, концерттен түшкөн каражат жана мэриянын резервдик фондунан буга чейин бөлүнгөн сумма операциянын бардык чыгымдарын толук жаба албай турганын аныктадык. Анткени кошумча чыгашалар да бар. Ушуга байланыштуу мен жетишпеген сумманы өз мойнума алууга даярмын», — деди мэр.

Белгилей кетсек, буга чейин Жаңы жыл алдында өлкөнүн башкы балатысынын жандыруу аземинде мэр Айбек Джунушалиев Насыйкат Баймырзаевага мэриянын резервдик фондунан акчалай сертификат тапшырган.

Насыйкат Баймырзаева №5 искусство мектебинде, азиз жана начар көргөн балдар үчүн интернатта окуйт. Ал бир катар эл аралык конкурстардын катышуучусу жана жеңүүчүсү болуп саналат.