Бүгүн, 2025-жылдын 31-августунда, Ала-Тоо аянтында Кыргыз Республикасынын Эгемендүүлүк күнүн майрамдоо жана жаңы окуу жылынын башталышына байланыштуу коомдук тартипти сактоо үчүн кызмат өтөөгө чыгууда турган Бишкек шаарынын ИИББнин өздүк курамынын гарнизондук саптык кароосу өттү.

Иш-чарага Бишкек шаарынын мэри Айбек Джунушалиев жана шаардык ИИББнин башчысы Азамат Токтоналиев катышты.

Сап учурунда кызматкерлерге нускама берилип, коомдук тартипти камсыздоо боюнча милдеттер коюлду.

Мэр Бишкек шаарынын ИИББ жетекчилигине шаардыктардын коопсуздугун, коомдук тартипти жана жол кыймылынын коопсуздугун камсыздоону, ошондой эле тыгындарды алдын алуу боюнча ыкчам чараларды көрүүнү тапшырды.

Шаар башчысы жаңы окуу жылы башталышы менен шаар мектептеринде 265 миңге жакын окуучу билим ала турганын белгилеп, алардын коопсуздугуна өзгөчө көңүл бурууну милдеттендирди.

Белгилей кетсек, быйыл 1- жана 2-класстарга 39 миңден ашуун бала барат.

«Биздин мойнубузда чоң жоопкерчилик турат. Балдарыбыздын коопсуздугун биргелешкен аракеттер менен камсыз кылабыз деп ишенем», — деди мэр.

Урматтуу борбор калаанын тургундары жана коноктору! Эгемендүүлүк күнүн белгилөөдө кыргыз эстрада жылдыздарынын катышуусунда масштабдуу концерт өтөт. Коомдук тартипти жана   жүрүм-турум эрежелерин так сактоону суранабыз.