Бүгүн, 2025-жылдын 29-августунда, Кыргыз Республикасынын Президенти Садыр Жапаровдун катышуусунда Кыргызстандын Эгемендүүлүк күнүнө карата өлкө боюнча 60тан ашык өндүрүш ишканаларынын салтанаттуу ишке киргизүү аземи  өттү. Мамлекет башчысы онлайн форматта бир убакта бардык объектилерди ишке киргизди.

Бишкек шаарында төрт өнөр жай ишканасы ишке кирди: «1-индустриалдык-кампа комплекси» ЖЧКсынын кондитердик цехи, «МД-Инвест» ЖЧКсынын «Караван» соода-логистикалык борбору, «Интеграл-Гранд» ЖЧКсынын керамикалык идиш чыгаруучу ишканасы жана «Кара-Балта спирт заводу» мамлекеттик ишканасынын филиалы болгон «Идеал-Фарм» дары-дармек чыгаруучу ишканасы.

Кондитердик цехтин ачылыш аземине Бишкек шаарынын мэринин биринчи орун басары  Мирланбек Байгончоков, ишкананын директору Роман Киц жана «Умай Групп» ЖЧКсынын өкүлү Бермет Танабаева катышты. Байгончоков өз сөзүндө жаңы өндүрүш ишканалары борбор калааны өнүктүрүүнүн негизи болуп, цехтин өзү 160 адамды иш менен камсыз кылаарын белгиледи.

Аянты 16 гектарды түзгөн "Караван" соода-логистикалык борборуна курулуш материалдарын сатууга жана атайын техниканы ижарага берүүгө адистешкен сегиз ангар кирет. Комплекс 1000ден ашык жумушчу орундарын түзүп, өлкөнүн логистикалык инфраструктурасын өнүктүрүүнүн маанилүү звеносуна айланат.

70 адам иштеген «Интеграл-Гранд» ЖЧКсынын керамикалык идиш-аяктарды чыгаруучу цехи сапаттуу продукция чыгаруунун толук циклин түздү. Завод Кыргызстанда мындай профилдеги биринчи ишкана болот.

"Кара-Балта спирт заводунун" «Идеал-Фарм» филиалы медициналык спиртти, антисептиктерди жана парфюмериялык-косметикалык каражаттарды чыгарууга адистешкен. Бул жерде 150гө жакын кызматкер эмгектенет жана продукциялар саламаттыкты сактоо тармагында да, күнүмдүк турмушта да суроо-талапка ээ.

Бишкек шаарында жаңы ишканалардын ачылышы борбор калаанын өнөр жай потенциалын чыңдоодо жана шаар тургундары үчүн кошумча жумуш орундарын түзүүдө маанилүү кадам.