«Бишкек жылуулук тармагы» муниципалдык ишканасы Курманжан Датка көчөсүндөгү магистралдык жылуулук тармагын реконструкциялоо боюнча пландык иштерди улантууда.

Бул иш-чаралар келе жаткан 2025-2026-жылдардын жылытуу мезгилине даярдык көрүү максатында жүргүзүлүүдө. Кыдыруунун жүрүшүндө калаа башчысы Айбек Джунушалиев курулуш иштеринин жүрүшү менен таанышып, аткарылып жаткан иштердин сапатына басым жасап, реконструкциялоонун темпин тездетүү боюнча тапшырмаларды берди.

Учурда бул жерде эски жылуулук магистралдык лотокторду демонтаждоо жана алмаштыруу иштери жүрүп жатат. Чүй проспектиси менен кесилишкен жерге асфальт төшөө иштери бүткөрүлгөн. Эскирген түтүктөрдү диаметри 700 мм болгон жаңысына алмаштырууга өзгөчө көңүл бурулууда.

Фрунзе көчөсүнөн Салиева көчөсүнө чейинки тилкеде диаметри 426 мм болгон түтүктөрдү орнотуу иштери аяктап, үстүнкү лотокторду орнотуу жана кайра толтуруу иштери башталды. Шаар башчысы Свердлов райондук администрациясына жана жол-транспорттук  инфратүзүмдү өнүктүрүү департаментине коммуникациялар боюнча параллелдүү иштерди координациялоо боюнча конкреттүү тапшырмаларды берди.

Муниципалдык аймакты мыйзамсыз ээлеп алган объектилерди демонтаждоо маселесине өзгөчө көңүл бурулууда. Бишкек шаарынын мэриясы жылуулук тармактарына жүргүзүлүп жаткан реконструкциялоо шаардын инфраструктурасын модернизациялоо боюнча комплекстүү программанын маанилүү бөлүгү экендигине көңүл бурат. Бардык иштер бекитилген пландарга жана графиктерге  ылайык жүргүзүлүүдө, бул жылытуу мезгилинде борбор калаанын тургундарын жылуулук менен үзгүлтүксүз камсыздоого мүмкүндүк берет.