Низами Ганджеви атындагы №103 мектепте  «Наристе»  V Эл аралык балдар фольклордук фестивалынын алкагында жаркын жана кеңири маданий иш-чара — «Тынчтык сабактары» өттү.

Салтанаттуу иш-чарага Бишкек шаарынын Муниципалдык администрациясынын башчысынын орун басары Асел Садыкова катышты. Фестивалдын коноктору болуп Москвадан, Тува Республикасынан, Казакстандан, Молдовадан жана өлкөбүздүн Жалал-Абад облусунан келген делегациялар болушту, бул иш-чаранын эл аралык жана маданияттар аралык мүнөзүн баса белгиледи.

«Тынчтык сабактары» алкагында «Шайыр балалык» балдардын чыгармачылык борбору жана №103 мектеп улуттук кол өнөрчүлүк боюнча көргөзмө уюштуруп,  мастер-класстарды өткөрүштү. Ошондой эле улуттук оюндар көрсөтүлүп, кыргыз ашканасынын даамдары тартууланып, этностук биримдик менен маданий өз ара түшүнүшүү атмосферасы түзүлдү.

Ар кайсы өлкөлөрдөн жана аймактардан келген делегациялар концерттик номерлерди көрсөтүп, элдик маданияттардын көп түрдүүлүгүн жана байлыгын чагылдырышты. Бишкектик мектеп окуучулары да өз чыгармачылык өнөрлөрүн көрсөтүп, достукту жана өз ара түшүнүшүүнү чыңдоого салым кошушту.

Иш-чаранын соңунда конокторго эстелик белектер тапшырылып, маданий мурастарды сактоо жана эл аралык кызматташтыкты өнүктүрүүнүн маанилүүлүгү белгиленди.

Иш-чара этностук стилде өтүп, улуттук суусундуктар жана  тамак-аштар менен этно-фуршет, ошондой эле элдердин ортосундагы достук менен тынчтыктын символу болгон флешмоб менен жыйынтыкталды.

«Наристе» фестивалы Кыргызстандын салттуу элдик маданиятын сактоого жана өнүктүрүүгө, ошондой эле ар түрдүү өлкөлөрдүн элдик чыгармачылыгы аркылуу маданияттар аралык байланыштарды чыңдоого багытталган.