Бишкек шаарынын мэриясынын жыйындар залында мэр Айбек Джунушалиевдин төрагалыгы алдында укук бузуулардын алдын алуу боюнча координациялык кеңештин кезектеги жыйыны өттү.

Жыйында 2025-жаңы жылды майрамдоого даярдыктар жана башка актуалдуу маселелер талкууланды.

Айбек Джунушалиев 14-декабрда балаты жандыруу аземинде шаардыктардын жана борбор калаанын конокторунун санын эске алуу менен жаңы жыл түнү нөөмөттү күчөтүүнү, укук тартибин жана жарандардын коомдук коопсуздугун жана укук коргоо органдарынын кызматкерлеринин максималдуу санын камсыздоону тапшырды.

Жарандардын коопсуздугун камсыз кылуу жана жолдордогу авариялык кырдаалдарды алдын алуу максатында тиешелүү кызматтарга оюн-зоок унааларынын өтүүчү жолдо жана тротуарларда жүрүүсүнө жол бербөө тапшырылды.

Муниципалдык инспекцияга стихиялуу сооданы болтурбоо тапшырмасы берилди.

Бишкек шаарынын МСЭКБга өз компетенциясынын чегинде тийиштүү иштерди жүргүзүү жана "Ала-Тоо" борбордук аянтындагы жана анын периметри боюнча коомдук тамактануу жайларында, ошондой эле райондук иш-чаралар пландаштырылган участоктордо санитардык-эпидемиологиялык нормаларды сактоону көзөмөлгө алуу тапшырылды.

Мындан тышкары, Айбек Джунушалиев селди  алдын алуу максатында Ала-Арча жана Аламүдүн дарыяларынын нугун тазалоо иштерин күчөтүүнү тапшырды.

"Бишкекжашылкурулуш" муниципалдык ишканасына Кашка-Суу айылындагы дамбага чыгууну уюштуруу жана суунун деңгээлин салыштыруу, ошондой эле сууну өз убагында агызуу боюнча Чүй суу чарба башкы башкармалыгы менен сүйлөшүү тапшырмасы берилди.