Бишкек шаарынын мэри Айбек Джунушалиев мэриянын жетекчилиги жана шаардык кызматтардын башчылары менен биргеликте көчмө жыйын өткөрдү.
Текшерүү Орто-Сай базарынан башталып, башаламан сооданы иретке келтирүү иштери менен таанышты.
Айбек Джунушалиев тургундар менен жолугушуп, көйгөйлүү маселелер укту.
Башаламан соода түйүндөрү талапка жооп бербегендиктен бузулуп, жумушсуз калган шаардыктар үчүн муниципалдык кызматтардагы бош орундар сунушталды. Бул мурдагы соодагерлерге жумушка орношуунун альтернативдүү жолдорун табууга жана эмгек рыногуна интеграцияланууга мүмкүндүк берет.
Соода ишин улантууга кызыкдар болгондор үчүн мэрия Кыргыз Республикасынын мыйзамдарына ылайык анын карамагына өткөн базарлардан соода жайларын берүүгө даяр.
Базарда жумушсуз жарандарга жардам бере турган маалымат пункттарын ачуу пландалууда. Алар муниципалдык кызматтагы бош орундар, эмгек шарттары жана эмгек акылары тууралуу маалымат беришет.
Мыйзамсыз иштеп жаткан объектилерди, ошондой эле жарнамалык көрнөктөрдү, электр зымдарын демонтаждоо иштерин аягына чыгаруу, базардын аймагындагы ички жолдорду калыбына келтирүү, арыктарды тазалоо жана көрктөндүрүү боюнча тапшырма берилди.
«Зима-Лето» ЖЧКсына имараттардын сырткы фасадын жагымдуу көрүнүшкө келтирүү боюнча билдирүү берилди. Соода түйүндөрүнүн бирдиктүү көрүнүшүн түзүү тапшырмасы берилип, коомдук тамактануу жайларына карата санитардык-гигиеналык нормаларга өзгөчө көңүл бурулду.
Калаа башчысы андан кийин борбор калаанын түштүк тарабындагы Ала-Арча дарыясынын учурдагы абалын текшерди. Мэр Айбек Джунушалиев муз (майдаланган муз) коркунучун болтурбоо үчүн дарыянын нугун механикалык тазалоону тапшырды.
Аламүдүн дарыясынын батыш тарабын тазалоо жана анын айланасын көрктөндүрүү милдети коюлган.
Андан кийин муниципалитеттин башчысы автобекеттердин аймагындагы иштерди дагы бир жолу текшерди.
Маршрут боюнча Бишкек автобекети ишканасы текшерилип, анда жүргүнчүлөргө жана айдоочуларга ыңгайлуу шарттарды түзүүгө, маалымат-түшүндүрүү иштерин жүргүзүүгө көңүл бурулду.
Айланма жолдун жээгинде мыйзамсыз иштеп жаткан объектилер аныкталды, алардын ээлерине муниципалдык аймакты уруксатсыз орнотуулардан өз ыктыяры менен бошотуу тууралуу эскертүү берилет.
Көчмө жыйындын акыркы пункту убактылуу иштеп жаткан батыш автобекети болду, ал жерден Ош-Баткен-Жалал-Абад-Талас багыттары каттайт.
Муниципалитеттин башчысы ошондой эле жаңы автобекет курулуп бүткүчө убактылуу автобекеттин толук кандуу иштеши үчүн шарттарды түзүүнүн маанилүүлүгүн белгиледи.
Бул тапшырмалар Бишкек шаарынын мэри Айбек Джунушалиевдин жана тиешелүү кызматтардын жетекчилеринин туруктуу көзөмөлүндө болот.
