Бишкек шаарында Кыргызстандын көрүнүктүү мамлекеттик ишмери жана лидери Исхак  Раззаковдун  114 жылдыгына арналган эскерүү кечеси өттү.

Иш-чара И. Раззаковдун үй-музейинде өткөрүлүп, маданият өкүлдөрү, коомчулуктун өкүлдөрү жана туугандары чогулуп, эскерүүлөрү менен бөлүшүштү.

Эскерүү кеченин расмий бөлүгүн мемориалдык музейлердин бириккен дирекциясынын директору Арман Момаханова ачып, конокторду куттуктап, Раззаковдун өлкө тарыхындагы орчундуу салымын белгилеп өттү. Ошондой эле «Исхак Раззаков» фондунун өкүлү Замир Осмонов сөз сүйлөп, фонддун ишмердүүлүгүнүн улуу лидердин мурасын сактоодогу маанисин баса белгиледи.

Ардактуу архитектор Анарбек Жумакалиев өзүнүн жеке эскерүүлөрү менен бөлүшүп, Раззаковдун көз карашынын өзгөчөлүгүн белгиледи. Жолборс Жоробеков «Исхак Раззаковдун кыргыз мамлекетинин тарыхындагы орду» аттуу баяндама жасап, мамлекеттик ишмердин кыргыз мамлекеттүүлүгүнүн түптөлүшүнө жана бекемделишине кошкон салымын баса белгиледи.

Ардактуу маданият ишмери Кадыр Калилов «Исхак Раззаков - Улут лидери» деген темада доклад жасоо менен анын идеяларынын кыргыз эли үчүн маанисин белгиледи. Кеченин соңунда Исхак Раззаковдун кызы Эльмира Раззакова атасы тууралуу өзүнүн жеке эскерүүлөрүн камтыган «Атамды эстегенде» деген жүрөк козгоорлук сөзү менен чыгып сүйлөдү.

Эскерүү кечеси ар кандай муундардын өкүлдөрүн бириктирип, Исхак Раззаковдун мурасы Кыргызстандын тарыхы жана маданиятынын маанилүү бөлүгү бойдон кала берерин тастыктады.