Биринчи май райондук администрациясы Шаардык чарба департаменти менен биргеликте жаңы жылдык корпоративдик иш-чараларды өткөрүүнүн ордуна социалдык жатакананын тургундарына колдоо көрсөтүштү.
Профсоюздук чегерүүлөрдөн түшкөн каражатка мекеменин тургундарына шейшептер жана тамак-аштар алынды.
Белгилей кетсек, социалдык жатакана 63 орунга ылайыкталган. Эки кабаттуу имаратта 24 бөлмө (эки жана үч орундуу) керектүү эмеректер, кир жуучу жай, ашканасы бар. Ал жерде социалдык кызматтар көрсөтүлөт: бекер жатакана, ишке орноштурууда социалдык колдоо, кайра даярдоо, документтерди калыбына келтирүү жана психологдун кызматтары.
Учурда социалдык жатаканада мектеп-интернаттын 18 жаштан 23 жашка чейинки 40 бүтүрүүчүсү жашайт.
Эске салсак, борбор калаанын мэриясы быйылкы жылы жаңы жылдык корпоративдик иш-чаралардан кайрымдуулуктун пайдасына баш тартуу чечимин кабыл алган.
